Difaaca madaniga ah ee Suuriya ayaa sheegay, in 15 qof ay ku dhinteen 15 kalena ay ku dhaawacmeen – maanta oo Isniin ah – qarax baabuur oo ka dhacay magaalada Manbij ee ku taalla baadiyaha bari ee magaalada Xalab, taas oo dhacda waqooyiga dalka Suuriya.
Wariyaha Aljazeera ayaa soo sheegay, in dadka qaraxa ku dhintay ay ku jiraan 12 qof oo rayid ah, halka tiro intaas kabadana ay ku dhaawacmeen, isagoo xusay in haween iyo caruur ay ka mid yihiin dadka ku waxyeeloobay qaraxan cusub.
Ciidamada Suuriya ayaa sheegay, in gaariga uu ku qarxay meel u dhow gaari ay saarnaayeen tobanaan haween ah oo ku sii jeeday inay ka shaqeystaan dhul beereedka magaaladaas.
Waa weerarkii toddobaad ee baabuur ama baaskiil loo adeegsado oo ka dhaca Manbij muddo shan toddobaad gudahood ah, sida ay sheegeen ciidamada difaaca rayidka ee Suuriya. Maalin ka hor ayay aheyd markii 3 qof oo rayid ah ay ku dhinteen qarax gaari oo ka dhacay bartamaha magaaladan.
