Wasaaradda caafimaadka ee Falastiin ayaa ku dhawaaqday Istishhaadka 70 qof oo Falstiiniyiin ah tan iyo bilowgii sanadkan, inta lagu guda jiro howlgallada ciidamada gumeysiga Yahuuddu ay ka wadaan Daanta Galbeed, halka ciidamadan ay ku qasbeen 75% dadka deggan xerada Tulkarm inay ka cararaan guryahooda.
Wasaaradda caafimaadka ee Falastiin ayaa sheegtay, in howlgallada ciidamada Yahuuddu ay ku shahiideen 70 Falastiiniyiin ah oo ku sugnaa Daanta Galbeed tan iyo bilowgii sanadkan 2025-ka, kuwaas oo ay ku jiraan 10 carruur ah, qof dumar ah iyo laba qof oo da’ ah.
Wasaaradu Waxay intaas ku dartay, in dadka ku shahiiday ay ka mid ahaayeen 38 Falastiiniyiin ah oo reer Jenin ah, 15 ka mid ah reer Tubaas, 6 ku sugnaa Nablus, 5 qof oo daganaa magaalada Tulkarm, 3 kale oo ku shahiiday Khaliil, halka 2 qofna ay ku shahiideen Beytul Maqrib iyo 1 qof oo ku shahiiday magaalada Qudus.
Tan iyo 21-kii bishii Janaayo, ciidamada gumeysiga ayaa howlgal milateri ka waday magaalada Jenin iyo nawaxigeeda, taas oo keentay in la dilo 25 Falastiiniyiin ah ilaa fiidnimadii Axadda, halka Isniintii la soo dhaafay ay ciidama Yahuuddu isku ballaariyeen Tulkarm, taas oo keentay in la dilo 3 qof oo Falastiiniyiin ah.
Geesta kale, gudoomiyaha magaalada Tulkarm ayaa shaaca ka qaaday, in ciidamada guumaysiga Yahuuddu ay ku qasbeen in ka badan 75% oo ah dadka degan xerada Tulkarm in ay xoog uga barakacaan guryahooda.
Sawirro gaar ah oo ay heshay wakaalada Aljazeera ayaa muujinayey, dhaq-dhaqaaqyo ay ciidamada gumeysiga ka wadaan waddooyinka magaalada, iyo gaadiid dagaal oo suuqa magaalada ku weeraray gaari khudaar sida.
Ciidanka guumaysiga ayaa sii wada hawl-galkooda milatari ee ay ka wadaan magaalada Tulkarm maalintii siddeedaad oo xiriir ah, iyadoo ay ciidamada Yahuuddu si balaaran u soo dhoobteen meelo kala duwan oo ka tirsan magaalada.
Dhinaca kale, warbaahinta Falastiin ayaa sheegtay, in ciidamada guumaysiga Yahuuddu ay gawaadhida gaashaaman soo dhoobeen magaalada Tamuun ee Tubas markii ugu horreysay tan iyo markii uu bilowday duulaanka ciidamada Yahuudda ee Daanta galbeed.
Ciidamada gumeysiga ayaa sidoo kale ku qasbay 12 qoys oo Falastiiniyiin ah inay ka baxaan guryahooda oo ku yaallay magaalada Tamuun, waxayna guryahaas ka dhigteen xeryo ciidan oo ay ka duulaan tagaan.
Dhanka kale Guutada Tubas ee ka tirsan guutooyinka Al-Qudus ayaa sheegtay, in dagaalyahanadooda ku sugan magaalada Tamuun ay iska hor imaad la galeen ciidamada guumeysiga Yahuudda ee ku sugan magaaladaas.
Ciidamada Yahuudda ayaa maalintii labaad sii wada duulaanka gardarada ah ee ay ku hayaan Falastiiniyiinta iyo hantidooda oo ay ka wadaan xerada Farca iyo magaalada Tamuun oo ka tirsan gobolka Tubas ee waqooyiga Daanta galbeed ee la haysto.
Iyadoo ay ku soo beegantay xilli uu bilowday dagaalka dabar-goynta ah ee ay Yahuuddu ku hayso marinka Qaza, ciidamada Yahuudda iyo dadka Shaayinada ah ee lagu deegaameeyay dhulka Muslimiinta ayaa balaariyay weerarrada ay ka geysanayaan Daanta Galbeed, oo ay ku jirto bariga Quddus, taas oo sababtay dhimashada in ka badan 900 oo Falastiiniyiin ah iyo dhaawaca 6,700 oo qof, halka 14,300 oo qofna la xiray.
