Saxafiga Hossam Shabat, ayaa maanta lagu dilay duqayn cirka ah oo ay Yahuuddu la beegsatay baabuurkiisa oo marayay xaafada Jabalia ee dhacda waqooyiga marinka Qaza.
Xafiiska warbaahinta dowladda ee Gaza ayaa ku dhawaaqay, in tirada saxafiyiinta la dilay tan iyo markii uu billowday dagaalka Yahuudda ee marinka Gaza ay gaartay 208 saxafi.
War qoraal ah oo ka soo baxay xafiiska ayaa waxaa uu si kulul u cambaareeyey beegsiga ciidamada Yahuuddu ay ku hayaan saxafiyiinta Falastiiniyiinta, iyagoo ugu baaqay dhamaan hay’adaha saxafiyiinta caalamka in ay cambaareeyaan dambiyadan joogtada ah ee ka dhanka ah saxafiyiinta Falastiiniyiinta iyo xirfadlayaasha warbaahinta ee marinka Gaza.
Shabaat ayaa shahiiday wax ka yar kaddib markii uu bartiisa Facebook-ga soo dhigay war ku saabsan geerida weriye Maxamed Mansuur oo ah weriye u shaqeynayay TV-ga Falastiin, kaddib weerar kan la mid ah oo lala beegsaday gurigiisa oo ku yaalla magaalada Khan Yuunis ee koonfurta marinka Gaza.
Tirada dhimashada duqeymaha ay Israa’iil ka geysatay Qaza 48-kii saac ee lasoo dhaafay ayaa gaartay 61 qof, halka 134 ay ku dhaawacmeen, sida lagu sheegay bayaan kasoo baxay wasaaradda caafimaadka ee Gaza.
