23 qof ayaa ku Shahiiday, tiro kalena waa lagu dhaawacay tan iyo waaberigii maanta, duqeymo isdaba joog ah oo ay ciidamada Yahuuddu ka geysteen bartamaha iyo koonfurta marinka Ghaza, duqeymahaas oo lala beegsaday guryo iyo teendhooyin ay ku noolaayeen dad barakacayaal ah.
Magaalada Khan Yuunis oo ku taalla koonfurta marinka Gaza, laba qof oo Falastiiniyiin ah oo mid ka mid ah uu ilmo yahay ayaa lagu dilay, kuwa kalena waa ay ku dhaawacmeen, kadib duqeyn ay Yahuuddu ku qaadday guri ku yaalla deegaanka Qizan Al-Najjar oo ka tirsan Khan Yuunis.
Magaalada Hamad ee waqooyiga Khan Yuunis, saddex Falastiiniyiin ah oo uu ku jiro ilmo ayaa iyaguna lagu dilay weerar ay Sahaayinada ka fulisay halkaas, kaas oo lala beegsaday teendho ay ku noolaayeen dad barakacayaal ah.
Qof Falastiini ah ayaa sidoo kale ku dhaawacmay duqeymo ka dhacay bariga magaalada Abasan al-Kabira, marka lagu daro shan ruux oo ku shahiiday iyo in ka badan 20 qof oo ku dhaawacmay, weerarro ay diyaaradaha Yahuuddu la beegsadeen xaafado ka tirsan xerada al-Bureij ee bartamaha marinka Gaza iyo wadada al-Nakhil ee Deir al-Balah.
Geesta kale Deegaanka Al-Zawaida, diyaaradaha dagaalka ee Yahuudda ayaa beegsaday guri ay degan yihiin qoysas badan oo barakacayaal ah, waxaana ka dhashay dhaawacyo kala duwan.
Arrintan ayaa ku soo beegantay iyadoo ay Sahaayinada dib u billowday 18-kii bishan Maarso, duqeymaheedii cashwaagi ahaa ee ay ka wadday marinka, kuwaas oo horay u galaaftay noolasha kumanaan ruux oo an waxba galabsanin, halka ay ku dhaawacmeen kumanaan kale.
