Ciidanka Yahuudda ayaa subaxnimadii hore ee maanta ku dhawaaqay, in ay duqeeyeen bartilmaameedyo ku yaalla laba saldhig oo ay ciidammada Suuriya ku leeyihiin gobolka Homs ee bartamaha dalkaas, waana markii labaad muddo saddex maalmood gudahood ah oo ay bartilmaameedsanayaan halkaas.
Jimcihii la soo dhaafay ayay ahayd markii ciidanka Sahaayinada ay sheegteen, in awooda milateri oo istiraatiiji ah ay ku beegsadeen saldhigyada ciidammada Suuriya ee magaalada Palmyra iyo saldhigga ciidammada cirka ee T-4 ee bartamaha Suuriya.
Waxay intaas ku dareen, in saldhigga Tadmur iyo saldhigga ciidamada cirka ee T-4 ay ku jiraan awood ciidan oo hore, waa sida ay hadalka u dhigeene.
Ilo wareedyo ayaa warbaahinta u sheegay, in laba ka tirsan ciidamada wasaaradda difaaca ee Suuriya ay ku dhaawacmeen weerarka danbe ee dhacay Jimhii.
Muddo bilo ah, Yahuudda ayaa duqeymo cirka ah ka waday Suuriya maalin kasta, iyadoo badankooda ku dishay dad rayid ah, halka mararka qaar ay ku burburisay goobo milatari, gaadiid iyo saanad ciidan oo ay Suuriya leedahay.
Xadgudubyada Yahuudda ee ka dhanka ah Suuriya ayaa sii socota, inkastoo maamulka cusub ee Suuriya, ee uu hoggaamiyo Madaxweyne Axmad al-Sharaa, uusan sinaba ugu hanjabin Sahaayinada.
