Siiriga digniinta ayaa laga maqlay meelo kala duwan oo ku yaala bartamaha dhulka ay Yahuuddu gumaysiga ku haysato ee Falastiin, waxaana wararku ay tilmaamayaan in illaa 70 gantaal laga soo riday dhanka xadka Lubnaan, ururka Shiicada ah ee Xisbullaah ayaa xaqiijiyay in ay beegsadeen goobo ciidan oo ay Sahaayinadu lahayd, kuwaas oo sababay dhimasho iyo dhaawac badan.
Dhinaca kale, Channel-ka 13-aad ee Yahuudda ayaa sheegay, in ay la kulmeen wax kabadan 70 Gantaal oo laga soo riday dalka Lubnaan, kuwaasi oo lala beegsaday goobo ku yaala Waqooyiga dhulka ay Yahuuddu gumaysiga ku haysato, oo ay ka mid yihiin Acre, Kriut, iyo Galile.
Duqa magaalada Kriut , oo ku taal meel u dhow Haifa, ayaa xaqiijiyay in gantaal uu ku soo dhacay magaaladaas, kaas oo gaystay khasaare kala duwan.
Bayaan goordhow kasoo baxay ururka Xisbullaah ayaa lagu sheegay, in diyaarad nooca aan duuliyaha laheyn ee loo yaqaano Israel Hermes 450 lagu soo riday magaalada Deir Saryan ee koonfurta Lubnaan, ayagoo xusay in diyaaradaha dagaalka Yahuudda ay weerareen diyaarada Drone ah, kadib markii la soo riday.
