Ugu yaraan 5 falastiiniyiin ah ayaa ku shahiiday tobanaan kalena waa ay ku dhaawacmeen duqeymo ay Yahuuddu ka geysatay meelo kala duwan oo katirsan Marinka Qaza, waxaana sidoo kale la beegsaday cisbitaalka Kamaal Adwan ee ku yaalla magaalada Beit Lahia ee waqooyiga Marinka Qaza.
Wariyaha Aljazeera ayaa soo sheegay in 3 falastiiniyiin ah ay ku shahiideen in ka badan 24 kalena ay ku dhaawacmeen, duqeyn ay Yahuuddu la beegsatay teendhooyinka barakacayaasha ee magaalada Khan Yuunis.
Haweeney Falastiiniyad ah ayaa ku shahiiday, halka dad kalana ay ku dhaawacmeen duqeyn ka dhacday guri ku yaalla deegaanka Sheekh Naasir ee bariga Khan Yuunis, sidoo kale haweeney Falastiiniyad ah ayaa ku shahiiday, tiro kalena waa ay ku dhaawacmeen duqeyn cirka ah oo lala beegsaday guri ku yaalla xerada Nuseirat ee bartamaha Marinka Qaza.
