Ilo wareedyo ka tirsan militariga Ruushka ayaa sheegay in difaaca cirka ay u suurtagashay , in ay hawada sare ee gobolka Kursk ku soo ridaan labo gantaal iyo 27 diyaaradood aan duuliyaha lahayn oo laga soo diray dalka Ukraine.
Barasaabka gobolka Kursk ee Ruushka, ninka lagu magacaabo Alexei Smirnov, ayaa war qoraal ah oo uu soo saaray waxa uu ugu baaqay dadka ku nool gobolkaasi in aanay u dhawaanin burburka diyaaradaha iyo labadii gantaal ee la soo riday, sida ay sheegtay wakaaladda wararka Ruushka ee Sputnik.
Wasaaradda Difaaca ee Ruushka ayaa sheegtay shalay, in khasaaraha ciidamada Ukraine ee kasoo gaartay gobalka Kursk-ga ay gaarayaan in ka badan 360 askari 24-kii saac ee lasoo dhaafay, taasoo ka dhigeysa tirada guud ee khasaaraha soo gaaray ciidanka inay tahay illaa 35,050 askari tan iyo markii uu billowday isku daygii lagu doonayay in lagu weeraro gobolka Kursk.
