Diyaaradaha dagaalka Yahuudda ayaa duqeeyay dhismaha dowladda hoose ee Deir al-Balah, waxaana ku shahiiday in kabadan 10 Falastiiniyiin ah oo ay ku jiraan carruur iyo haween, halka dad kale oo intaas kabadana ay ku dhaawacmeen.
Ilaha caafimaadka ayaa sheegay, in 11 falastiiniyiin ah ay ku shahiideen ku dhawaad 40 kalena ay ku dhaawacmeen duqeymo ay Yahuuddu ka geysatay dhowr guri iyo dugsiyo ay ku noolaayeen dad barakacayaal ah oo ku yaalla magaalada Qaza iyo waqooyiga Marinka Qaza tan iyo waaberigii saaka .
Wariyaha Aljazeera ayaa soo sheegay, in 4 falastiiniyiin ah ay ku shahiideen ku dhawaad 10 kalena ay ku dhaawacmeen duqeyn cirka ah oo ay Yahuuddu la beegsatay guri ku yaalla waqooyiga marinka Qaza, Tiro kale ayaa sidoo kale ku dhaawacmay Sadex duqaymo oo lala beegsaday xaafadaha kala ah Al-Balad, Al-Nazla, iyo Jaffa Street oo ku yaalla waqooyiga magaalada Qaza.
Weriyaha Aljazeera ayaa sheegay, in 5 qof oo Falastiiniyiin ah ay ku shahiideen ku dhawaad 20 kalena ay ku dhaawacmeen weerar ay Yahuuddu ku qaaday Iskuulka Al Majda Wasila oo ay ku nool yihiin dad barakacayaal ah oo ku yaalla galbeedka magaalada Qaza.
Wariyaha Aljazeera ayaa intaa ku daray, in Labo ruux oo Falastiiniyiin ah ay ku shahiideen ku dhawaad 7 kalana ay ku dhaawacmeen, kaddib markii diyaarad helicopter ah ay weerar ku qaaday iskuul ay degan yihiin dad barakacayaal ah oo ku yaalla wadada Jaffa ee xaafada Al-Tuffah ee waqooyi bari magaalada Qaza.
