Ciidamada Ukraine ayaa xalay weerar ku qaaday dalka Ruushka, kaas oo loo adeegsaday diyaarad ah nooca aan duuliyaha lahayn ee Drones-ka, taas oo sababtay dab ka kacay gobolka Astrakhan ee dalka Ruushka, weerarkan ayaa hakad galiyay duullimaadyadii garoomada diyaaradaha ee magaalada la weeraray iyo magaalooyin kale, Sida ay sheegeen saraakiisha Ruushka.
“Ciidamada hubaysan ee Ukraine waxay isku dayeen inay weerar loo adeegsaday diyaarad aan duuliye lahayn ay ku qaadaan bartilmaameedyo xadidan oo ay ku jiraan xarumaha shidaalka iyo tamarta ee gobolka Astrakhan” waxaa sidaas bartiisa Telegramka ku sheegay Igor Babushki oo ah guddoomiyaha gobolka Astrakhan ee koonfurta Ruushka.
Shirkada gaadiidka cirka ee Ruushka Rosaviatsia ayaa sheegtay, inay hakisay duulimaadyadii ka imaan jiray garoomada Astrakhan, Kazan, Nizhnekamsk, Saratov iyo Ulyanovsk si loo xaqiijiyo amaanka dulimaadyadaas.
Kiev iyo Moscow ayaa axadii is dhaafsaday eedeeymo la xiriira duqeymo loo geystay iskuul ay gabaad ka dhiganayeen dad rayid ah oo ku yaalla magaalo ay Ukraine gumeysato oo ku taalla gobolka Kursk ee Ruushka, halkaas oo dagaallo ay ka socdeen muddo lix bilood ah.
Dhanka kale, weerarrada gantaallada ah iyo kuwa loo adeegsaday diyaaradaha aan duuliyaha lahayn ee Ruushka ayaa ugu yaraan 18 qof ku dilay Ukraine tan iyo fiidnimadii Jimcaha, sida ay sheegeen mas’uuliyiinta Kiev.
