Kadib markii ciidamada Suudan ay u gudbeen caasimada Khartoum, madaxa golaha madaxbanaanida ee Suudan ahna taliyaha ciidamada qalabka sida Abdel Fattah al-Burhaan ayaa carabka ku adkeeyay, in ciidanku ay ku dhow yihiin guul dhameystiran kadib markii ay jabiyeen ciidamada Taageerada Degdega ah.
Mar uu Khudbad u jeediyay ciidamada ka qeyb qaadanaya xoreynta Khartoum ayuu yiri: “Waxaan ku dhownahay guul dhammaystiran kadib markii aan ka adkaannay maleeshiyaadka ku sugan daafaha caasimadda.”
Ciidamada Suudan iyo maleeshiyaadka taageeraya ayaa saacadihii lasoo dhaafay gudaha u galay deegaanada Koonfur-Bari ka xiga gobolka Khartoum, iyagoo ka yimid dhanka Jaziira.
Goobjoogayaal ayaa soo sheegay, in deegaanka Al-Caylafuun oo dhanka koonfur bari kaga beegan magaalada Khartoum ay ku arkeen gaadiid ciidan oo ku sii jeeday caasimada Khartoum.
Halka ilo-wareedka kale ay sharxeen, in ciidamada Suudan ay go’doomin doonaan gobolka Bariga Niil, halkaas oo ay ku sugan yihiin xoogaga Taageerada degdega ah, ka hor intaysan u gudbin Khartoum.
Arintaan ayaa imaanaysa iyadoo ciidamada Suudan ay saacadihii lasoo dhaafay ay gacanta ku dhigeen magaalada Al-Kamlin ee dhacda gobalka Al-Jaziira.
