Ugu yaraan toddobo qof oo uu ku jiro ilmo yar, ayaa ku dhintay 42 kalena way ku dhaawacmeen, kaddib markii bas rakaab ah uu ku dhacay baabuur marayay koonfurta Ciraaq, kaas oo ku dhacay meel biyo mareen ah, sida ay saraakiishu sheegeen.
Dhanka kale, Agaasimaha Waaxda Xiriirka Warbaahinta ee Maamulka Caafimaadka Diwaniyah Amer Al-Kanani, ayaa yiri, “Toddobo qof ayaa dhintay oo ay ku jiraan afar rag ah, laba dumar ah iyo gabadh, halka ay 42 kalena ku dhaawacmeen, kuwaas oo ay ku jiraan laba qof oo qaba dhaawacyo halis ah,” isagoo xusay in dadka dhintay ay ahaayeen rakaab saarnaa gaari bas ah, sida ay sheegtay wakaaladda wararka ee France-Presse.
Ilo-wareed gargaar ah ayaa u sheegay AFP in shilku uu yimid kaddib markii Darawalkii baska uu xakamayn waayay jihada gaariga, taas oo keentay inay isku dhacaan labo gaari oo goobta marayay. Wuxuu intaas ku daray in dhammaan dadka dhintay iyo kuwa dhaawacmay ay ahaayeen Ciraaqiyiin u socday magaalada Najaf.
Ilo wareedyo ka tirsan booliiska Diwaniyah ayaa xaqiijiyay tirada dhimashada, iyagoo xusay in rakaabka baska ay kasoo jeedaan gobolka koonfureed ee Basra. Waxaa xusid mudan in magaalooyinka Najaf iyo Karbala ay sanad walba booqdaan malaayiin shiico ah oo ka kala yimaada daafaha caalamka.
Shilalka gaadiidka ayaa inta badan ka dhaca dalka Ciraaq oo ay la il daran yihiin dagaallo iyo colaado dhowr iyo toban sano socday oo sababay inay burburaan kaabayaashii dhaqaalaha, gaar ahaan waddooyinka iyo buundooyinka.
