Warbaahinta Yahuudda ayaa sheegtay in dhaqdhaqaaqa iska caabinta Falastiiniyiinta ee Xamaas iyo maamulka Yahuuddu laga yaabo in ay is dhaafsadaan xubno ka kala tirsan labada dhinac oo qaar kood ay yihiin maydka askar Yahuudd ah oo horay loo dilay, kaddib markii ay qayb ka qaateen arintan dhexdhexaadiyeyaal qayb ka ah heshiiskii xabbad joojinta ee Marinka Qaza.
Wargeyska Maariv ayaa soo xigtay ilo-wareedyo Yahuudd ah fiidnimadii Isniinta, kuwaas oo sheegaya in wada-xaajoodyo xooggan ay hadda socdaan, iyadoo Yahuuddu ay doonayso inay soo dhawayso maydadka 4 maxbuus maalinta khamiista ah ee soo socota, iyo 6 maxbuus oo nool, kuwaas oo la filayo in lasoo daayo maalinta Sabtida ah ee nagusoo aadan.
Wararka ayaa intaa ku daraya in amar lagu siiyay ciidamada Yahuudda eek u sugan meelo ka tirsan marinka Qaza, in ay u diyaar garoobaan suurta galnimada in la helo tiro ka mid ah meydadka maxaabiista Yahuudda maalinta Khamiista.
Dhanka kale, Channel 12 ee Yahuudda ayaa sheegay in Tel Aviv ay sii deyn doonto dhammaan haweenka iyo carruurta aan qaan-gaarin ee ay ka soo xirtay marinka Qaza, si ay Xamaas u soo celiyaan meydadka Israa’iiliyiinta.
Lix dufcadood oo maxaabiis is dhaafsi ah ayaa dhex martay Xamaas iyo Yahuudda tan iyo markii uu dhaqan galay heshiiska xabbad joojinta 19-kii Janaayo, kaddib dagaal socday 15 bilood oo xiriir ah, kaas oo ay ku shahiideen kuna dhaawacmeen illaa 160 Kun oo qof oo Falastiiniyiin ah.
