Magaalada Al-Sanamayn ee gobolka Darca ayaa marti galisay iska hor imaadyo rabshado wata oo dhexmaray ciidamada amniga gudaha ee dawladda Suuriya iyo kooxo hubeysan oo ka haray nidaamkii Bishaar Al-Asad.
Madaxa amniga gudaha ee maamul goboleedkaas, Cabdul Razzaq Al-Khatib, ayaa sheegay in iska horimaadka uu sababay dhimasho iyo dhaawac soo kala gaaray dhinacyadii dagaalamay iyo dad rayid ah oo ku sugnaa goobta uu dagaalku ka dhacay.
Subaxnimadii Arbacada ayaa waxaa soo gaaray magaalada ciidamo gurmad ah oo ka socda wasaaradda gaashaandhigga Suuriya, si ay u taageeraan ciidamada amniga gudaha ee duullaanka ku qaaday fariisimaha maleeshiyaatkii halkaas isku aruusday, iyadoo weli iska hor’imaadyo ay ka socdaan dhismayaal ku yaalla xaafadaha Koonfur Galbeed magaalada.
Sida lagu baahiyey Channelka rasmiga ah ee Daraa, ciidamada ayaa go’doomiyey dhufeysyadii ugu dambeeyey ee ay kooxahaasi ku sugnaayeen, iyadoo ilo-wareedyo dhinaca amaanka ah ay xaqiijiyeen in kooxahan ay ku hawlan yihiin xasuuqa dadka deegaanka oo ay dhufeysyo ka dhex sameysteen gudaha xaafadahooda, taasoo keentay in si taxadar leh loo soo dhexgalo, si looga fogaado dhibaato kale oo soo gaarta dadka rayidka ah.
Wasaaradda arrimaha gudaha ee dalka Suuriya ayaa kordhisay howlgallada amniga lagu xaqiijinayo ee ka socda gobollo kala duwan, iyadoo lagu beegsanayo haraadiga maamulkii Bashaar Al-Asad iyo canaasiirta ku howlan tahriibinta hubka.
