Ciidamada Kenya ayaa xabsiga u taxaabay Yaasir Siciid Carmaan, oo ah hoggaamiyaha isbaheysi lagu magacaabo Sumoud iyo madaxa dhaqdhaqaaq isna lagu magacaabo xoreynta shacabka Waqooyiga-Suudaan, siyaasigaan ayaa la istaajiyay isla markii uu ka soo degay garoonka diyaaradaha ee Nairobi, ka hor inta aan lagu xirin hoteel ku yaalla magaalada.
Ilo-wareedyo la hadlay warbaahinta ayaa sheegay, in xariga Armaan uu salka ku hayo waaran soo qabasho ah oo kasoo baxday mas’uuliyiinta Suudaan sannadkii hore, taasoo qayb ka ah liis ay ku jireen illaa 45 hoggaamiyeyaal siyaasadeed iyo kuwo suxufiyiin ah, oo uu ku jiro Abdullah Hamdok, ra’iisul wasaarihii hore iyo madaxii hore ee isbahaysiga Sumoud.
Bayaan uu soo saaray Dhaqdhaqaaqa xoreynta shacabka Waqooyiga-Suudaan, ayaa lagu sheegay, in Yaasir Carmaan uu u yimid Nairobi si uu ula kulmo qaar ka mid ah Diblumaasiyiinta Reer Galbeedka, balse lagu joojiyay Garoonka Diyaaradaha, sababo ku aadan war ka soo baxay Xukuumadda Suudan.
Qareenka u hadlay siyaasiga xabsiga loo taxaabay ayaa sheegay, inuu xarigaan aad ula yaaban yahay, maadaama 6 ka mid ah dadka la raadinayo ee liiska ku jira ay maalmo ku sugnaayeen Nairobi oo ay ka qeyb galeen shir lagu aasaasay isbaheys lagu magacaabo “Tasis”, kaasoo socday illaa Arbacadii, waa sida uu hadalka u dhigaye.
Bishii Abriil 2024-kii, guddi uu sameeyay taliyaha ciidamada Suudan Abdel Fattah al-Burhan ayaa xafiiska dacwad oogista ee Port Sudan u gudbiyay waaran soo qabasho ah oo ka dhan ahaa siyaasiyiin iyo suxufiyiin ka soo horjeeday dagaalka, oo ay ku jiraan Ra’iisul Wasaarihii hore Abdalla Hamdok iyo wasiiro ka tirsanaa dawladdii rayidka ahayd ee talada laga tuuray Oktoobar 2021.
