Weerar duqayn ah ayay ciidamada Ruushku ku beegsadeen dekada Odessa ee badda madow, duqayntan ayaa lagu dilay Afar qof oo kasoo jeeda dalka Suuriya, kuwaas oo saarnaa mid kamida maraakiibta xamuulka qaada ee ku xirnaa halka ay duqayntu ka dhacday.
Maamulka dawladda Yukrayn ayaa maanta ku dhawaaqay, in afar qof oo u dhashay dalka Suuriya lagu dilay mid kalena lagu dhaawacay weerar duqayn ah oo ay fuliyeen diyaaradaha Ruushka, kuwaas oo bartilmaameedsaday dekedda Odessa ee Badda Madow.
Wasiir tirsan dalka Yukrayn ayaa sheegay, in dadka la beegsaday ay saarnaayeen markab uu ka babanaayay calanka dalka Barbados, kaas oo siday qamandi loo dhoofinayay Algeria, wasiirkan ayaa carabka ku adkeeyay in Ruushku uu bartilmaameedsanayo kaabayaasha dhaqaalaha ee Yukrayn.
Xiisadda militari ee u dhaxeysa Moscow iyo Kyiv ayaa sii kordhaysa, iyadoo ciidamada Ruushku ay beegsanayaan kaabayaasha muhiimka ah ee dhaqaalaha dalkaas, halka Yukrayna ay isku dayeyso inay weeraradaas kaga jawaabto diyaaradaha aan duuliyaha lahayn ee ay ku beegsanayso xarumaha militariga ee Ruushka.
