Wargeyska Sahaayinada ee Yedioth Ahronoth ayaa sheegay in askarta kaydka ah ee ciidamada Yahuudda ee bilooyin ku jiray adeegga milatariga, ay si isa soo taraysa u raadinayaan gargaar si ay u helaan daawaynta caafimaadka dhimirka.
Wargeysku waxa uu tilmaamay, in askar badan oo kamida kuwa kaydka ay qaabileen xarumaha daawaynta xanuunada nafsiga ah tan iyo markii la bilaabay barnaamij u oggolaanaya xuquuqdan. Waxa uu tibaaxay wargeyska, in 170 kun oo askari ay iska diiwaan geliyeen barnaamijkan si ay uga faa’iidaystaan adeegyada daaweynta xanuunada nafsiga ah.
Isla wargeyskan ayaa warbixin uu soo saaray bishii November ee la soo dhaafay ku sheegay, in qiyaaso kala duwan oo ku saabsan ciidamada Yahuudda ay muujinayeen in illaa boqolkiiba 15% askarta nidaamiga ah ee kasoo baxay Gaza ay awoodi waayeen in ay dib ugu soo laabtaan dagaalka sababo la xiriira dhibaatooyinka ay la kulmeen intii ay ku jireen dagaalka iyagoo maskax ahaan u xanuunsan.
Wargeysku waxa uu sheegay, in kumanaan askari oo ka tirsan ciidamada Yahuudda ay horay u booqdeen xarumo caafimaad oo gaar ah oo ay samaysteen ciidamada Sahaayinada, isaga oo intaa ku daray ,in saddex meelood meel dadka naafada ah ee la aqoonsan yahay ay la ildaran yihiin xanuuno uu kamid yahay isku dhex yaac dhanka maskaxda ah, wargeyska oo qoraalkiisa sii wata ayaa yiri “tani waa bilow oo kaliya, maadaama heerka dhimirka askartu ay caddaan doonto haddii ay xabbaddu istaagto”.
Sida laga soo xigtay markhaatiyaal badan oo uu soo xigtay wargeyska, ku dhawaad cutub kasta oo ka dagaallamay Gaza ama Lubnaan ayaa tiro badan oo ka mid ah askartooda laga saaray ciidamada sababo la xariiro xanuuno dhanka maskaxda ah.
Wargeysyada Yahuudda ayaa horey u soo bandhigay dhibaatooyinka nafsiga ah ee ay la kulmeen askarta Sahaayinada. Wargeyska Jerusalem Post ee Yahuudda ayaana sheegay, in kiisas badan oo is-dil ah laga soo calaamadeeyay askartii kasoo laabatay marinka Gaza.
Wargeysku waxa uu soo tebiyay xisaabo qeexaya naxdinta ay askarta Yahuudda kala kulmeen dagaalkii Gaza,waxa uu sheegay in kuwa dhimashada ka badbaaday ay ka baqayeen in dib loogu celiyo dagaal.
