Militariga dawladda Suudaan ayaa ku dhawaaqay in ay la wareegeen goobo cusub oo istaraatiiji ah oo ku yaalla bartamaha magaalada Khartoum, iyadoo maalmahan dambe ay ciidamadu samaynayaan hormaro la taaban karo oo dhanka dagaalka ah.
Afhayeenka ciidamada Suudaan, Sarreeye Guuto Nabil Cabdallah Cali ayaa war qoraal ah oo uu soo saaray ku sheegay, in ciidamadiisu ay ka gudbeen buundada xoriyadda, taasoo isku xirta degmooyinka koonfurta Khartoum iyo bartamaha magaalada, waxayna ku guulaysteen inay la wareegaan goobo istaraatiiji ah oo ay hore gacanta ugu hayeen ciidamada Taageerada degdegga.
Waxa uu intaasi ku daray Afhayeenku, in ciidanka gaashaman iyo kuwa dawladdu ay dagaal adag ku qaadeen maleeshiyaadka RSF ee ku sugnaa Xarunta Taliska Guud, kaddib markii ay ku guuleysteen inay maleeshiyaadkan ka nadiifiyaan Isbitalka Waxbarashada ee magaalada.
Dhanka kale kooxaha gurmadka deg-degga ah ee gobolka Khartoum ayaa bayaan ay soo saareen ku sheegay, in Ciidamada Taageerada Degdegga ah ay xad-gudubyo baahsan ka geysteen xaafadaha Khartoum dhowrkii maalmood ee la soo dhaafay, taasoo keentay dhimashada ku dhawaad 50 qof, oo ay ku jiraan 10 qof oo mutadawiciin ahaa.
