Ciidamada Yahuudda ayaa gudaha u galay magaalooyinka iyo tuulooyinka ku yaalla Daanta Galbeed, waxayna arrintani ku soo beegantay iyadoo ay iska horimaadyo u dhexeeya ciidamada iska caabinta iyo gumaystaha ka dhaceen deegaanno kala duwan oo ka tirsan Daanta Galbeed.
Ilo deegaanka ah ayaa sheegay, in gaadiidka dagaal oo ay wateen ciidamada gumeysiga ay xalay gudaha u galeen magaalada Silat Al-xarithiya oo dhanka galbeed kaga beegan magaalada Jenin, waxayna halkaasi ku qabteen tiro dhalinyaro ah, iyagoo gubay guryo ay lahaayeen dadka rayadka ah.
Dagaalkan ayaa waxaa barbar socday iska horimaad hubeysan oo ciidamada muqaawamada ay walxaha qarxa kula beegsadeen ciidamada gumaystaha.
Guutada Al-Qudus ayaa shaaca ka qaaday, in dagaalyahanno ka tirsan guutada Al-Sila Al-xarithiya ay qarxiyeen gaari nooca dagaalka ah oo ay wateen ciidamada gumaystaha, ayna gaarsiiyeen waxyeello xooggan.
Guutada Al-yaamuun ee taabacsan guutooyinka Al-Qudus ayaa xaqiijisay, in dagaalyahanadeeda ay dagaallo hubeysan la galayaan ciidamada gumeysiga, iyagoo taageeraya Guutada Al-Sila Al-Xarithiya oo iyaduna dagaallo dhowr ah ka wada gudaha magaalada.
Dhinaca kale ciidamada gumaysiga ayaa gudaha u galay magaalada Beyt Furik, waxayna wararku intaas ku darayaan in ciidamada gumaysigu ay xoog ku galeen guryo badan oo ay degan yihiin Falastiiniyiinta oo ku yaalla xaafada bari ee magaalada, waxayna xabsiga u taxaabeen wiil dhalinyaro ah oo ku sugnaa xaafada Waadi Al-Badhan.
Ciidamada Yahuudda ayaa sidoo kale xoog ku galay xerada Al-Arroub oo dhanka waqooyi kaga beegan Al-Khaliil. Askarta qabsatay xerada ayaa xadgudabyo ka geystay xerada iyagoo la dhacay dadka rayidka ah rasaas xooggan, bambooyin iyo sunta dadka ka ilmeysiisa.
Ciidamada qabsaday xerada ayaa ku qasbay milkiilayaasha dukaamada inay xiraan dukaamadooda, iyadoo xerada lagu soo daadiyay ciidamo aad u badan.
Dhanka kale hay’adda Bisha Cas ee falastiiniyiinta ayaa ku dhawaaqday geerida wiil dhalinyaro ah oo ay ciidamada gumaysigu rasaas ku fureen isagoo ku sugnaa xerada Nour Shams, waxayna ilo wareedyo u sheegeen warbaahinta, in qaraxyo is xigxigay ay ka dhaceen xerada, waxayna ciidamada gumaysigu bilaabeen inay burburiyaan waddada aadda qabuuraha, waxayna ku soo rogeen bandow dadka degan mandiqada bari.
Guutada Qassam ee garabka melleteri ee Xamaas ayaa sheegtay, in wiilka ku shahiiday xerada Nuur Shams uu ahaa Iyas Cadli Al-Akhras, waxayna sheegeen inuu shahiiday kadib markii uu iska hor imaad la galay askarta cadowga ee ku sugan gudaha xerada.
Guutada Al-Qassam oo u hanjabtay ciidamada Yahuudda ayaa sheegtay, in ciidanka gumaystaha ay la kulmi doonaan weeraro kale oo gaadmo ah oo lagu dhiig bixiyo askartooda.
Tirada shuhadada ee ku shahiiday Tulkarm oo ay 14-kii maalmood ku socotay duullaanka gardarada ah ayaa gaartay 8 ruux, tobanaan dhaawac ah, halka kumanaan kalana ay ka barakaceen magaalada.
Dhinaca kale gawaari ay leeyihiin ciidamada Yahuudda oo ay la socdaan cagaf-cagafyo ayaa gudaha u galay magaalada Tamuun ee koonfurta Tubas, ilo wareedyo ayaa warbaahinta u sheegay in ciidamada gumaysigu ay qabteen wiil dhalinyaro ah oo ka soo jeeda deegaankaasi.
Ciidamada gumeysiga ayaa sidoo kale xoog ku galay xaafadda Kafr Aqab oo dhanka waqooyi kaga beegan magaalada Qudus ee la heysto.
21-kii Janaayo, ciidamada Yahuudda waxay bilaaween hawlgal militari oo ay ku qaadeen waqooyiga Daanta Galbeed, magaalada Jenin, xeradeeda Jenin iyo magaalooyinka ku xeeran. Kadib gumaystaha waxa uu duulaankiisa ku fiday magaalada Tulkarm iyo xeradeeda 27-kii isla bishaas, ka hor inta aysan kusoo duulin 2-dii bishii Febraayo magaalada Tamuun iyo xerada Farca ee gobolka Tubas, iyagoo isaga baxay Tamuun kadib markii ay go’doomiyeen 7 maalmood, ilaa haddana waxa ay duulaanka ku hayaan xerada Farca.
