Ciidamada Ruushka ayaa shalay oo Arbaca ahayd waxa u suurtagashay, in ay la wareegaan labo magaalo oo cusub oo mid ka mid ah ay ku taallo gobolka Kharkiv halka midda kalana ay dhacdo Donetsk, waxayna sheegeen in ay xalay soo rideen 28 diyaaradaha aan duuliyaha lahayn ee Ukraine.
Wasaaradda Difaaca ee Ruushka ayaa ku dhawaaqday, shalay oo Arbaco ahayd, in ciidamada Ruushka ay awood u yeesheen inay gacanta ku dhigaan magaalada Novomlinsk ee gobolka Kharkiv, iyo magaalada Baranovka oo ku taalla gobalka Donetsk, taasoo qayb ka ah howlgalka gaarka ah oo ay militarigooda ka fuliyeen goballadaas.
“Cutubyo ka tirsan Kooxda Xarunta Dhexe ee Ruushka waxay sii wadeen hawlgalkooda weerarka, waxayna xoreeyeen magaalada Baranovka oo dhacda Jamhuuriyadda Donetsk,” ayaa lagu yiri bayaan ka soo baxay Wasaaradda Difaaca ee Ruushka.
War-saxaafadeedka oo sii socday ayaa lagu yiri: “Ciidamada Xarunta Dhexe waxay beegsadeen dhowr goobood oo ay ciidamada Ukraine kaga sugan yihiin gobal Donetsk, waxaana ciidamada Ukraine ay ku waayeen in ka badan 500 oo askari, halka looga burburiyay tiro madaafiic ah, iyo 3 gaadiid oo ah nooca dagaalka.”
Wasaaradda ayaa bayaankeeda ku sheegtay in ciidamadeedu ay beegsadeen awoodda iyo agabka ciidamada Ukraine ee ku sugan dhowr goobood oo ka tirsan Donetsk iyo Kharkiv, iyagoo sheegtay inay dileen in ka badan 220 askari, dhanka kalana burburiyeen tiro madfiic ah iyo baabuurta gaashaaman oo yaallay 4 xarumood oo ay ku sugan yihiin ciidamada Ukraine, halka ay burburiyeen 5 bakhaar oo rasaasta lagu kaydiyo.
