Ciidanka dawladda Suudaan ayaa xaqiijiyay in ay gacanta ku dhigeen Xerada Taiba oo ahayd saldhiggii ugu dambeeyay ee ay maleeshiyaadka Taageerada Degdegga ah kaga sugnaayeen Caasimadda Suudaan ee Khartoum.
Kahor inta aan la qabsan saldhigan taliyaha howlgallada ee ciidamada Suudaan ayaa sheegay, in ciidamadiisu ay ku soo wajahan yihiin bariga Khartoum, waxayna sheegeen inay guuldarooyin qaraar dhabarka u saareen xoogagga Taageeradda Degdegga ah ee ku sugnaa halkaas.
Goobaha istaaraatiijiga ah ee ay saacadihii lasoo dhaafay la wareegeen ciidamada dawladda Suudaan ayaa kala ah: xaruntii difaaca cirka ee magaalada Khartoum, xarumaha kuliyada Injineerinka ee Jaamacadda Suudaan, guud ahaan degmada Al-Nahda, iyo wadada Al-Sahafa oo xigta dhanka dekadda Khartoum.
Hawlgaladan ayaa ku soo beegmaya xilli taliyaha howlgallada Sarreeye Gaas Abdel Rahman Al-Bilawi uu u sheegay warbaahinta, in ciidamadoodu ay si buuxda ula wareegeen gacan ku haynta garoonka diyaaradaha ee magaalada Khartoum.
