Ciidamada Suudaan ayaa ku dhawaaqay in ay la wareegeen deegaano ka tirsan magaalada Al-Fasher ee xarunta gobolka Waqooyiga Darfur, iyadoo halkaas ay ka dheceen dagaallo qaraar oo jab culus lagu gaarsiiyay ciidamada Taageerada Degdegga ah.
War qoraal ah oo ka soo baxay qeybta Lixaad ee ciidamada lugta ee Suudan ayaa lagu sheegay, in ciidamadoodu ay gacanta ku dhigeen deegaano ka tirsan magaalada Al-Fasher ee xarunta gobolka Waqooyiga Darfur, waxayna xaqiijiyeen inay sii wadi doonaan dagaalka ay maleeshiyaadka RSF kaga xoraynayaan dalka Suudan.
Yasser Al-Atta, oo ah xubin ka tirsan ma’uuliyiinta dalka Suudan ahna Kaaliyaha Taliyaha Guud ee Ciidanka Suudan Cabdifatax Al-Burhaan, ayaa ku nuuxnuuxsaday in dagaalladu aysan joogsan doonin ilaa taako kasta oo ka mid ah dhulka Suudan laga xoreeyo ciidamada Taageerada Degdegga ah.
Maalmihii lasoo dhaafay ciidamada Dacmu Sariic ayaa magaladan iyo deegaanada hoos yimaada ka gaysanayay gabood fallo baahsan oo ay ku xasuuqayaa dadka shacabka ah, iyadoo maamulka dawladda Suudan ay sheegeen in todobaadkan la dilay wax kabadan 400 oo qof oo shacab ahaa, kuwaas oo lagu dilay tuulooyin hoos taga magalada Al-Fasheer.
