Wasaaradda arrimaha gudaha ee Suuriya ayaa ku dhawaaqday, in la xiray sarkaal hore oo ka tirsanaan jiray sirdoonka milatariga ee nidaamkii burburay ee Bashaar Al-Asad, kaas oo lagu eedeeyay in uu ku lug lahaa dhacdooyinkii u dambeeyay ee ka dhacay xeebaha dalkaas.
Waxay intaasi ku dartay wasaaradda, in “Agaasinka Amniga Baadiyaha ee Dimishiq uu xiray dambiile lagu magacaabo Shadi Adel Mahfouz, kaas oo kasoo shaqeeyay Laanta Sirdoonka Militariga gaar ahaab qaybta 277, xilligii dowladdii hore, wuxuuna mas’uul ka ahaa qoritaanka Laanta Sirdoonka Militariga, isagoo hadda lagu eedeeyay inuu galay dambiyo dagaal.”
Shadi Mahfouz, ayaa lagu eedeeyay, inuu dhawaan dagaallo kala qayb qaatay haraadigii taliskii hore ee Bashaar Al-Asad, kuwaas oo beegsanayey ciidamada ammaanka iyo kuwa milatariga ee ku sugan xeebaha Suuriya.
Ninkan ayaana lagu wadaa in la horgeeya garsoorka dalkaas, si uu uga qaado tillaabada sharciga ah ee lagama maarmaanka ah.
