Wargeyska New York Times oo soo xigtay askar Yukreeniyaan ah ayaa sheegay, in ciidamada dalkaas ay isaga baxeen dhammaan gobolka Kuruska ee Ruushka, oo ay galeen Todobo bilood ka hor.
Saraakiisha Ruushka ayaa dhankooda xaqiijiyay, in ciidamadooda ay shalay galeen dagaal ay ku doonayeen, inay kusoo afjaraan ciidamadii ugu dambeeyay ee Ukraine ee ku sugnaa gobalka.
Isbadalladaan ayaa kusoo beegmayo xilli uu madaxweynaha Ukraine Volodymyr Zelenskyy, go’aansaday inuu shaqada ka ceyriyo taliyaha guud ee ciidamada qalabka sida, sida lagu sheegay wareegto soo baxday Axaddii. Tallaabadas oo u muuqata mid uu ku qarinayo fashil iyo guuldarrada ciidamadiisa kasoo gaaray dagaalka ka socda gobalka Kuruska.
Ciidamada Ukraine ayaa ka tallaabay xadka galbeed ee Ruushka illaa Kuruska bishii Agoosto, dagaalkaas oo ahaa mid ka mid ah dagaalladii ugu caansanaa ee socday saddexdii sano ee la soo dhaafay, kaas oo ujeedadiisu ahayd in lagu mashquuliyo ciidammada Moscow, isla markaana ay gorgortan ka galaan wadahadal kasta oo suurtagal ah oo lala galo madaxweynaha Ruushka Vladimir Putin.
Laakin weerar rogaal celis ah oo Ruushku qaaday bishan ayaa hoos u dhigay aagga ay Ukraine maamulaan ee galbeedka Ruushka illaa 110 kiiloomitir oo labo jibbaaran, marka la barbar dhigo in ka badan 1,368 kiiloomitir oo isku wareeg ah oo Kyiv laga qabsaday sannadkii hore.
