Diyaarad nooca aan duuliyaha lahayn ah oo ay lahaayeen ciidamada Yahuudda ayaa duqeysay goob ka tirsan magaalada Tamuun ee koonfurta Tubas, oo dhacda woqooyiga Daanta Galbeed, halka wargeyska Haaretz uu daaha ka qaaday qorshe Yahuuddu ay ku doonayso inay saldhig uga samaysato xaafadda Sheekh Jarrax ee magaalada Qudus ee la haysto, isla markaana laga eryo tobannaan qoys oo Falastiiniyiin ah.
Goob joogayaal ayaa u sheegay Aljazeera in maamulka guumeysiga Yahuuddu ay ciidamo lugta ah u direen deegaanka Tamuun, waxayna ciidamadu weerareen guryaha Falastiiniyiinta, iyagoo qaar kamida guryaha dadka shacabka ah ka dhigtay xeryo ciidan, halka ay xir xireen dadkii daganaa guryahaas.
Ciidamada gumeysiga ayaa sii wada howlgalkooda militari ee ka socda xerada Al-Fara ee koonfurta gobolka Tubas, ilo wareedyo deegaanka ah ayaa sheegaya in ciidamada gumeysiga ay gurmad dheeri ah u direen xerada, islamarkaana ay weerar ku qaadeen tiro guryo ah oo ay lahaayeen dadka deegaanka.
Sidoo kale Cagaf-cagafyada ay wataan ciidamada Yahuudda ayaa sameeyay howlgalo lagu burburinayo kaabayaasha dhaqaalaha, taasoo keentay in biyaha iyo korontadu ay ka go’aan qeybo badan oo ka mid ah xerada.
21-kii bishii Janaayo ciidamada gumeysiga ayaa howlgal milateri ka bilaabay magaalada Jenin, waxaana howlgalkaas lagu dilay 25 Falastiiniyiin ah, ka hor intaysan ballaarin howlgalkooda milateri ee waqooyiga Daanta Galbeed, iyagoo gaaray magaalada Tulkam 27-kii isla bishaas, halkaasoo ay ku shahiideen 4 Falastiiniyiin ah, halka Axaddii uu howlgal milateri ka billaabmay magaalada Tamuun ee gobolka Tubas.
