Ciidamada Yahuudda ayaa sheegay, in rag hubeysan ay rasaas ku fureen ciidamadooda oo ku sugan baadiyaha Quneitra ee dhulka buuraleyda Golan Heights, waana markii ugu horreysay tan iyo markii ay billaabeen duullaanka ay ku hayaan Suuriya iyo qabsashada aagga difaaca ka caagan, kaddib dhicistii Maamulka Bishaar Asad.
Weerarkan oo dhacay fiidnimadii jimcaha ayay ciidamada gumeysigu ku sheegeen, in aysan jirin wax dhaawac ah oo soo gaaray askartooda, halka ay jiraan fashil dhanka amaanka ah oo ay ciidamada Yahuuddu kala kulmeen goobta ay weerarka kusoo qaadeen, waxayna sheegeen in ay jawaab ka bixiyeen rasaastii lagusoo riday.
Geesta kale, Idaacadda ciidamada Yahuudda ayaa ku tilmaantay dhacdadan mid halis ah oo walaac ku abuurtay saraakiisha Yahuudda, iyagoo xusay in weerkan uu yahay kii ugu horreyay oo ay wajahaan ciidamada Yahuudda.
Dhankiisa, wariyaha Aljazeera ayaa soo sheegay, in is rasaasayntan ay ka dhacday magaalada Taranja ee waqooyiga Quneitra, xilli ciidamada Yahuuddu ay gudaha u galeen magaalada.
Tan iyo markii la riday Bashaar Al-Asad 8-dii December, ciidamada Yahuudda ayaa duullaanno is xigxiga ku qaadayay magaalooyin dhowr ah oo ka tirsan gobollada Quneitra iyo Daraa oo labaduba dhaca xuduudka isku xira dhulka Fastiiniyiinta ee ay Yahuuddu gumaysiga ku haysato iyo Suuriya.
