Ciidamada Yahuudda ayaa xoog ku galay magaalada qadiimiga ah ee Nablus ee ku taalla woqooyiga Daanta Galbeed, waxaana ay halkaas ka gaysteen weeraro kala duwan, iyadoo ay socdaan howlgallada milateri ee ay ka wadaan xeryaha Jenin iyo Tulkarm tan iyo 21-kii Janaayo.
Goob joogayaal ayaa sheegay, in ciidamada Yahuuddu ay dhowr jiho ka weerareen magaalada Nablus, ayagoo baaritaano ku samaynayay guryaha dadka Falastiiniyiinta ah.
Shalay Axadadii ayay ciidamada gumaysigu hawlgalo milatari ka fuliyeen magaalada Nablus, kuwaas oo socday saacado badan, waxaana lagu dhaawacay 14 Falastiiniyiin ah oo uu ku jiro oday da’ ah iyo 4 caruur ah.
Dhinaca kale Yahuudda lagu deegaameeyay dhulka Falastiiniyiinta ayaa maanta barqadii weerar ku qaaday magaalooyinka Duuma iyo Juuriish oo dhanka koonfureed kaga beegan Nablus, waxayna halkaas ka gaysteen dhagax tuur, taas oo keentay in tiro ka mid ah dadka Falastiiniyiinta ah ay waxyeelo soo gaarto, sida ay sheegeen dadka deegaanka.
Yahuudda ayaa weerarada Daanta Galbeed wali sii wada ayadoo hada la filayo in loo fadhiisto kawada hadalka wajiga labaad ee heshiiska xabad joojinta, waxaana gaaray magaalada Qaahira gudi ka socda Yahuudda oo ka qayb galaya wada hadalo ku saabsan sii wadida wajiga kowaad ee heshiiska.
