Gumeystaha Yahuudda ayaa sii wada weerarada maalinlaha ah ee ay ka geysanayaan Daanta Galbeed, iyagoo howlgal cusub ka bilaabay Tubas, halka ay 10 qof ku xireen gobalka Salfit.
Ciidamada Gumaysiga ayaa Tobaneeyo Gaadiid dagaal ah iyo Cagaf-cagafyo geeyey Tubaas si ay u burburiyaan kaabayaasha dhaqaalaha ee dhowr meelood oo katiesan magaalada.
Ilo deegaanka ah ayaa warbaahinta u sheegay, in dagaalyahanada wax iska caabinta ay qarxiyeen gaadiid dagaal ee Yahuudda oo isku gadaamay agagaarka afaafka hore ee maxkamada,suuqii hore, afaafka hore ee dowladda hoose iyo gooba kale oo ka tirsan Tubaas.
Dhinaca kale, ilo-wareedyo ka tirsan warbaahinta falastiiniyiintu ayaa sheegay, in ciidamada guumaysiga Yahuudda ay xoog ku galeen tuulada Farkha ee gobolka Salfit, waxayna si gaar ah u beegsadeen guryaha dadka rayidka ah, iyagoo burburiyay wixii ku jiray, tacaddina u gaystay dadkii deegaanka, waxayna xireen in ka badan 10 ruux.
Ciidamada gumaysiga ayaa sidoo kale gudaha u galay xerada qaxootiga ee Al-Ain ee magaalada Nablus,waxayn halkaasi ku dileen wiil dhalinyaro ah oo Falastiiniyiin ahaa, waxayna diideen in maydkiisa laga qaado goobta.
Ciidamada guumaysiga Yahuudda ayaa sii wada weerarka iyo baaritaanka guryaha ee xerada Jenin ee Daanta Galbeed.
Wararka ayaa intaasi ku daraya, in ciidamada Gumeysiga ay gubeen tiro guryo ah, sidoo kalena ay burburiyeen dhismayaal kale oo xeradaasi ku yaalay, taasi oo keentay in dadka deegaanka ay isaga barakacaan.
Ciidamada Yahuudda ayaa xoojiyay xadgudubyada ay ka geysanayaan Daanta Galbeed, kadib markii ay kusoo jabeen duulaankii ay ku qaadeen Marinka Gaza.
