Ciidamada Suudaan ayaa shalay ku dhawaaqay, in ay si buuxda ula wareegeen xarunta madaxtooyada ee bartamaha Khartoum, kadib labo sano oo ay gacantoodu ka maqneyd.
Dib u qabsashada qasriga ayaa ka dhigan guul weyn oo ay ciidamadu ka gaareen loolanka halista ku ah inuu dalka kala qeybsamo.
Ciidanka dalkaas ayaa soo bandhigay muuqaallo muujinaya askartooda oo ku jira qasriga dhexdiisa, kaas oo muraayadahiisa ay burbureen, halka darbiyadiisana laga dheehan karay godad rasaasta ay labada dhinac iswaydaarsanayeen.
Dhankooda, Ciidamada Taageerada Degdegga ah ayaa sheegay, in ay weli ku sugan yihiin agagaarka Madaxtooyada, isla markaana ay qaadeen weerar ay u adeegsadeen diyaaradaha aan duuliyaha lahayn, ayna ku dileen askar badan oo ku sugnaa gudaha Madaxtooyada, waa sida ay warka u dhigeene.
Waxaa la filayaa in maalmaha nagu soo aaddan, ay ciidamada Suudaan dagaallo xooggan ku qaadi doonaan ciidamada Tageerada degdega ah, kuwaas oo weli gacanta ku haya dhul ballaaran oo dhanka Koonfureed kaga beegan madaxtooyada.
Ciidamada Taagerada Degdegga ah ayaa si deg-deg ah ula wareegay gacan ku heynta xaruntaasi oo ay wehliyaan inta badan caasimadda, kadib markii uu dagaalku qarxay 15-kii Abriil, 2023-kii. Waqtigaas oo la isku khilaafay ka mid noqoshada Ciidamada Taagerada Degdegga ah ee Ciidanka Suudaan.
Ciidanka ayaana muddo dheer dib u dhac ku yimid, balse waayadan dambe guulo la taaban karo ayay ka gaareen saaxada dagaalka, iyagoo dib u soo ceshaday dhul ku yaalla bartamaha dalka, halka ciidamada Taagerada degdega ah ay isku xoojiyeen gacan ku haynta Galbeedka.
