Ciidamada Suudaan ayaa horumarro cusub ka sameeyay galbeedka Khartoum, iyagoo dib ula wareegay xarunta Bankiga dhexe iyo dhismayaal ay lahaayeen shirkado iyo bangiyo dhowr ah oo ku yaalla xaafadda Al-Muqran ee galbeedka Khartoum.
Intaa ka hor, ciidanka Suudaan waxa ay ku dhawaaqeen, in ay bartamaha Khartoum ku dileen boqolaal ka tirsan ciidamada Taageerada Degdega ah.
Dhankiisa, Taliyaha Ciidanka Militariga ee Gobolka Badda Cas, Sarreeye Guuto Maxjuub Bushra, ayaa ugu baaqay reer Suudaan inay diidaan kala qaybsanaanta oo ay naftooda u huraan sidii ay u dhisi lahaayeen dowladnimada kadib marka uu dagaalku dhammaado.
Isagoo la hadlayay taageerayaasha ciidamada ee ku sugan magaalada Port Suudaan ayuu sheegay, in dhawaan Khartoum ay ka xoroobi doonto maleeshiyaadka Taageerada Degdega ah, isagoo amaanay dhammaan dhinacyada ka qeyb qaatay guushii ay ka gaareen xoogaga Taageerada Degdega ah ee ku sugan Khartoum.
Geesta kale, Abdel Fattah al-Burhan, oo ah Guddoomiyaha Golaha Qaranimada ee Suudaan, ayaa xaqiijiyay sii socoshada dagaalka iyo in ciidamadiisa ay si tartiib tartiib ah ugu sii siqayaan goobaha ay dalka kaga sugan yihiin xoogagga Taageerada Degdega ah.
Al-Burhaan ayaa carrabka ku adkeeyay, in aysan wax gor-gortan ah la geli doonin Ciidamada Taageerada Degdega ah, kadib markii ay diideen in ay hubka dhigaan.
Dagaal xooggan oo isdaba joog ah kadib, ciidanka Suudaan ayaa Jimcihii ku guuleystay, inay dib ula wareegaan qasriga looga arimiyo Dalkaas ee ku yalla magaalada caasimadda ah ee Khartoum, kadib laba Sano oo uu gacantoodu ka Maqnaa.
