Maamulka Jammu iyo Kashmir ee ay Hindiya maamusho ayaa baaraya cudur dahsoon oo dilay 17 qof, sida ay sheegtay warbaahinta maxalliga ah Sabtidii shalay.
Xaalado dhimasho ah oo ay ku jiraan 13 caruur ah ayaa laga soo calaamadeeyay tuulada fog ee Badhaal oo ka tirsan degmada Rajouri ee ismaamulka Jammu tan iyo horraantii Disembar. Wakaaladda wararka ee Hindiya ayaa ku warantay, in qiyaastii 230 qof oo tuulada ku nool la karantiilay horraantii toddobaadkan.
Amarjit Singh Bhatia, oo ah madaxa kuliyada caafimaadka ee dowladda ee ka hawl gala degmada Rajouri, ayaa sheegay, in dhaawac dhanka maskaxda ah iyo habdhiska neerfaha uu soo gaaray dhammaan dadka u dhintay cudurkaas.
Wakaaladda wararka ee Hindiya ayaa kasoo xigatay Bhatia oo leh”Fasaxa jiilaalka waa la joojiyay si wax looga qabto xaaladda degdegga ah ee caafimaadka”.
Dowladda federaalka ee Hindiya ayaa furtay baaritaan lagu samaynayo cudurkaan, iyadoo sheegtay in baaritaan horudhac ah oo la sameeyay lagu ogaaday in dhimashadu aysan sabab u ahayn wax “cudur, fayras ama bakteeriyo ah balse ay tahay sun”.
Geesta kale, maamulka magaalada galbeedka ku taalla ee Pune ayaa diiwaangeliyay ugu yaraan 73 xaaladood oo cillad dhanka neerfaha ah. Dadka uu saameeyay cudurkaas waxaa ka mid ah 26 haween ah, halka 14 ka mid ah bukaannada la geliyay qalabka lagu neefsado, sida ay sheegtay wakaaladda wararka ee Hindiya.
Cudurkan waxaa laga yaabaa inuu saameeyo neerfaha xakameynaya dhaqdhaqaaqa muruqa, taasoo keenta daciifnimo dhanka murqaha iyo luminta dhanka dareenka, halka kuwa ay saameeyeen laga yaabo inay ku adkaato liqitaanka iyo neefsashada.
