Wararka ka imaanaya marinka Ghaza ayaa tibaaxaya, in duqeymo ay shalay diyaaradaha cadawga Yahuuddu ka fuliyeen marinka Ghaza, ay labo jeer la beegsadeen goob ay ku sugnaayeen dad rayid ah oo ku taalla magaalada Beit Lahia, waxaana ka dhashay dhimaso iyo dhaawac soo gaartay dad shacab ah oo aan waxba galabsanin.
Wararka ayaa intaasi ku daraya, in 9 Falastiiniyiin ah ay ku dhinteen kuwa kalana ay ku dhaawacmeen duqeymo ay Yahuuddu maanta ka geysatay magaalada Beit Lahia oo ku taalla waqooyiga Marinka Ghaza.
Wariye ka hawlgalo Marinka Ghaza ayaa soo sheegay, in dadka ku dhintay duqaymahaas ay ka mid ahaayeen 4 wariye oo soo tabinayay dhacdooyinka iyo mashaariicda gargaarka ee ka socda Marinka, waxa uuna xaqiijiyay, in meydadka wariyaashaasi ay soo gaareen isbitaalka Indonesia ee magaalada Ghaza.
Sidoo kale Qof Falastiini ah ayaa ku dhaawacmay toogasha ay ciidamada Yahuuddu ka geysteen xaafadda Tel al-Sultan ee galbeedka Rafah, oo dhacda Koonfurta Marinka Ghaza.
Ciidanka gumaystaha Yahuudda ayaa si joogta ah u wada duqeymo dhanka cirka ah iyo toogasho tan iyo dhamaadkii wajigii koowaad ee heshiiskii xabbad joojinta ee Ghaza, taasoo keentay in tiro badan oo shacab ah ay dhimasho iyo dhaawac ko noqdaan.
