Wararka inaga soo gaaraya dhulka uu gumaystaha Yahuudda haysto ee falastiin ayaa sheegaya, in Diyaarad Drone ah oo kasoo duushay dalka Lubnaan ay duqeysay guri uu degan yahay Ra’iizul Wasaaraha Yahuudda Benjamin Netanyahu oo ku yaalla magaalada Kaysariya, waxaana ka dhashay qarax weyn.
War kasoo baxay Xafiiska Ra’iisul Wasaaraha Yahuudda ayaa lagu yiri “Diyaarad aan duuliye lahayn oo laga soo diray Lubnaan, ayaa si toos ah u garaacday guriga Benjamin Netanyahu ee magaalada Kaysariya”. Warbaahinta Yahuudda ayaa ku warantay in duqaynta diyaarada aan duuliyaha lahayn ee ka dhacday guriga Netanyahu ee Kaysariya ay sababtay dhawaq aad u weyn.
Channel 12 ee Yahuudda ayaa soo xigtay ilo ku sugan xafiiska Netanyahu, in ra’iisul wasaaraha iyo xaaskiisa aysan joogin gurigooda oo ku yaalla Kaysariya markii ay dhacaysay duqaynta diyaaradda.
Booliiska Sahaayinada ayaa qaaday tallaabo ay ku xirayaan waddooyinka magaalada Kaysariya, waxayna warbaahinta ka hor istaageen inay u dhawaadaan goobta ay wax aka dhaceen.
