Hal qof ayaa ku dhintay afar kalena way ku dhaawacmeen qarax maanta oo Isniin ah gilgilay afaafka hore ee dhismo waqooyi-galbeed ka xiga caasimadda Ruushka ee Moscow, kaas oo lala beegsaday hoggaamiyaha koox hubaysan oo dagaalka kula jirta ciidamada Ukraine ee ku sugan Donetsk.
Afhayeen u hadlay waaxda gurmadka degdega ah ee Ruushka ayaa sheegay, in dhismaha la bartilmaameedsaday uu ahaa dhismo ka kooban 29 dabaq oo ku yaalla meel 12 kilomitir u jirta Kremlin-ka.
Wakaaladaha wararka ee dalkaas ayaa daabacay, muuqaalo laga soo qaaday afaafka hore ee dhismaha la beegsaday, kuwaas oo muujinaya hool aad u burburay, albaab burburay iyo muraayado jabay.
Wakaalladda Wararka Ruushka ee TASS ayaa ku warantay, in dadka ku dhaawacmay weerarkaasi uu ku jiro Armen Sargsyan oo hoggaaminaya koox hubeysan oo ka tirsan Armenia, isla markaana taageera Ruushka, kuna sugan gobolka Donetsk ee bariga Ukraine, Wakaaladda wararka ee RIA ayaa xaqiijisay in weerarkaas uu sababay goynta qayb ka mid ah lugta Sargsyan.
Wargeyska Kommersant oo soo xiganaya ilo-wareedyo aan la magacaabin ayaa sheegay, in Sargsyan loo qaaday isbitaalka isagoo xaaladdiisu liidato, halka mid ka mid ah ilaaladiisa la dilay.
Qaraxa ayaa ahaa isku day dil oo lala beegsaday Sargsyan, oo Ukraine ay ku eedeysay inuu gacan ka geystay dagaalka Ruushka ee ka dhanka ah gobolka Donetsk, oo qaybo badan oo ka mid ah ay gacanta ku hayeen ciidamada Ruushka tan iyo 2014-kii.
Dalka Ruushka ayaa waxaa ka dhacay dilal qorsheysan iyo qaraxyo qarsoodi ah tan iyo markii uu bilaabay duulaanka ka dhanka ah Ukraine ku dhawaad saddex sano ka hor.
