Maleeshiyaadka Xuutiyiinta ee Yemen ayaa ku dhawaaqay, inay fuliyeen howlgal milateri oo tayo leh, kaas oo ay ku bartilmaameedsadeen garoonka diyaaradaha ee Ben Gurion ee gobolka Jaffa oo ka tirsan dhulka ay Yahuudda xoogga ku haysato ee Falastiin, iyaga oo adeegsanaya gantaalada balaastikada ah, waxayna intaas ku dareen, in hawlgalkan laga gaaray hadafkii laga lahaa.
Geesta kale, Ciidanka Yahuudda ayaa sheegay, in dhawaaqa siiriga digniiniha bixiya laga maqlay Tel Aviv, Qudus iyo bartamaha dhulka ay Yahuuddu gumaysato ee Falastiin, kadib markii gantaal laga soo riday Yemen.
Kooxa gurmadka degdega ah ee Yahuudda ayaa xaqiijiyay, in 13 qof ay ku dhaawacmeen xilli ay ku sii jeedeen godadka laga galo gantaallada.
Warbaahinta Yahuudda ayaa ku warrantay, in Ra’iisal-wasaaraha Yahuudda Benjamin Netanyahu oo ka qayb-galayay kal-fadhiga guud ee baarlamaanka Kaniisadda Yahuudda, si dag looga saaray hoolka baarlamaanka, isla markaana la geeyay goob ilaalo xooggan loo sameeyay, kadib markii seeriga laga maqlay magaalada Quddus.
Diyaarado kusii jeeday garoonka diyaaradaha ee Ben Gurion, kaas oo la kulmay weerarada Xuutiyiinta ayaa duulimaadkooda weeciyay, waxaana laga xusi karaa, diyaarad ka soo duushay London kuna sii jeeday garoonkaas, taas oo daqiiqaddii u dambeysay gabi aahanba badashay jihadeedii, kadib markii dhawaaqa seeriga laga maqlay magaalada Tel Aviv, oo garoonkaasi u jirta 20 Kiiloomitir oo kaliya.
Xuutiyiinta ayaa mararka badan weerarro gantaallo ah iyo kuwa loo adeegsaday diyaaradaha duuliyaha lahayn ku qaaday dhulka ay Yahuuddu gumaysato ee Falastiin, kuwaas oo qaarkood lala beegsaday magaalada Tel Aviv ee uu caasimadda ka dhigtay maamulka Yahuudda.
