Wararka inaga soo gaaraya dalka Yemen ayaa ku waramaya, ina diyaaradaha dagaalka ee Mareykanka ay fiidnimadii xalay duqeymo xooggan ka geysteen gobolka Al-Xudeyda ee galbeedka dalkaasi, kuwaas oo sababay khasaare nafeed iyo mid hantiyadeed.
Kooxda Xuutiyiinta ee ay taageerto dowladda Shiicada Iran ayaa ku dhawaaqay, in saddex qof ay ku dhinteen labo kalena ay ku dhaawacmeen duqeymaha diyaaradaha Mareykanka ay la beegsadeen gobolka Al-Xudeyda.
Anis al-Asbahi, oo ah afhayeenka Wasaaradda Caafimaadka ee Xuutiyiinta, ayaa sheegay, in Mareykanka uu dhowr duqeymo la beegsaday dhismaha Shirkadda Biyaha ee degmada Al-Mansuuriyah ee gobolka Al-Xudeydah, kuwaas oo sababay dhimashada saddex qof iyo dhaawaca labo kale, oo intooda badan ahaa shaqaale aan waxba galabsan oo ka tirsanaa shirkadda.
Hadalkan ayaa yimid wax yar kadib markii warbaahinnada xiriirka la leh xoogagga Xuuthiyiinta ay sheegeen, in duqeymaha cirka ee Mareykanka lala beegsaday dhowr goobood oo ay maamulaan Maleeshiyaadka Xuutiyiinta, oo ay ku jiraan kaabayaasha biyaha ee gobolka Xudeydah.
Muddo ku siman laba toddobaad, Mareykanka ayaa fuliyay duqeymo xooggan oo ka dhan ah goobaha ay ka taliyaan Xuutiyiinta, si uu u joojiyo weerarrada ay ku hayaan maraakiibta ku sugan Badda Cas iyo Gacanka Cadmeed, kuwaas oo ah marin badeedyo muhiim u ah Yahuudda xasuuqaysa ehelkeenna reer Ghaza.
