Booliiska Sweden ayaa Talaadadii sheegay, in dhowr qof lagu dilay laguna dhaawacay toogasho ka dhacday iskuul ku yaalla magaalada Orebro.
Tiro koob cusub oo la sameeyay, booliska Sweden ayaa ku dhawaaqay, in dhacdadaasi ay sababtay dhimashada 10 qof iyo dhaawaca dad kale.
Booliiska ayaa markii hore yiri: “Israsaasayn ayaa ka dhacday dugsiga, afar qof ayaa la toogtay, dhaawacyadu ma cadda, hawlgalkuna wuu socdaa.” Balse daqiiqado kadib, waxay ku dareen in qof shanaad la toogtay.
Sawirro laga soo qaaday goobta ayaa muujinayay, ciidamo booliis ah oo goobta gaaray, iyadoo lasoo dhoobay goobta gawaarida gurmadka deg dega ah.
“Wararka ku saabsan rabshadaha ka dhacay Örebro waa kuwo aad halis u ah, goobta waxaa ku sugan booliiska, howlgalkuna waa uu socdaa,” ayuu yiri waxa loogu yeero wasiirka cadaaladda ee Sweden, kaas oo la hadlay wakaaladda wararka Sweden ee TT.
Wasiirka ayaa intaa ku daray “Dowladdu waxay xiriir dhow la leedahay Booliska, si dhowna wa ay ula socotaa wixii soo kordha.” Iskuulku wuxuu ku yaallaa meel qiyaastii 200 kiiloomitir galbeed ka xigta magaalada caasimadda ah ee Stockholm, wax tafaasiil ahna kama haayno waxa uu salka ku haayo weerarkaas iyo cidda ka danbaysay.
