Maamulka Kuuriyada Koonfureed ayaa sheegay, in diyaarad milatari ay si lama filaan ah u riday siddeed gantaal, waxaana ku dhaawacmay Dad rayid ah, halka ay ku burbureen dhismayaal badan.
Mas’uuliyiinta dalkaas ayaa intaa ku daray, in gantaallada ay ku dhaceen guri ku yaalla magaalo 43 KM dhanka Waqooyi kaga beegan caasimadda dalkaas ee Seoul, halkaasoo ay ku dhaawacmeen 7 qof, isla markaana ay ku burburiyeen dhismayaal badan.
Wakaalada wararka Kuuriyada Koonfureed ee Yonhap ayaa sheegtay, in hadda uu socdo baaritaan lagu ogaanayo sida ay wax u dhaceen iyo sababta keentay inay diyaaradda kasoo fakadaan gantaalladaasi.
Arintaan ayaa kusoo beegmayso, iyadoo 29-Diseembar ee sanadkii ina dhaafay ay dalkaasi ku burburtay diyaarad rakaab ah oo ay saarnaayeen 181 qof, Shilkaas ayaana sababay dhimashada dhamaan rakaabkii la socday diyaaradda, marka laga reebo labo shaqaale ah oo la badbaadiyay.
