Warbaahinnada xiriirka la leh kooxda Xuthiyiinta ayaa sheegay, in diyaaradaha dagaalka ee Mareykanka ay markii labaad shalay galab bartilmaansadeen isbitaal ku yaalla gobolka Sacda ee waqooyiga Yemen, kaas oo lagu daweeyo dadka qabo burooyinka.
Dhankiisa Telefishinka Al Masirah ee taabacsan maleeshiyaadka Xuuthiyiinta ayaa warbixin kooban oo uu soo saaray ku sheegay, in diyaaradaha dagaalka ee Mareykanka ay fuliyeen 12 weerar, kuwaas oo ay la beegsadeen magaalada Sacda, nawaaxigeeda iyo deegaano kale oo ka tirsan gobolka, ayna ka dhasheen duqeymahaas khasaare isugu jira, dhimasho iyo dhaawac, iyadoo aan la sheegin tirada iyo khasaaraha inta uu la egyahay.
Sidoo kale wararku waxay sheegayaan, in weerar kale lagu beegsaday deegaanka Al-Sabr oo ka tirsan degmada Kitaf oo dhanka bari ka xigta magaalada Sacda.
Goob joogayaal ayaa wakaalada wararka ee AFP u sheegay, in ay maqlayeen duqeymo dhanka cirka ah oo aad u xooganaa oo ka dhacayay deegaano ka tirsan gobalka Sacda.
Sarkaal ka tirsan milatariga Maraykanka ayaa wakaaladda wararka ee AFP u sheegay, in Taliska dhexe ee Maraykanka ee Bariga Dhexe uu maalin kasta iyo habeen kasta duqeymo ka geysta goobo badan oo ay ku sugan yihiin Xuutiyiinta, waa sida uu hadalka u dhigaye.
Tan iyo 15-kii bishii Maarso, Mareykanka waxa uu waday duqeymo xooggan oo ka dhan ah Xuutiyiinta, kadib markii ay Xuutiyiintu shaaciyeen inuu hadaf malatari u yahay maraakiibta reer Galbeedka iyo kuwa Yahuudda ee mara Badda Cas.
