Maamulka Ukraine ayaa sheegay, in laba gobol oo ku yaalla bariga iyo badhtamaha dalka lagu garaacay weeraro xagga cirka ah oo ay fuliyeen diyaaradaha Ruushka, kaas oo dhacay subaxnimadii hore ee maanta, kaddib markii ay waaxda digniinaha soo saareen digniin ku saabsan weerarro xagga cirka ah.
Oleg Synegubov, oo ah guddoomiyaha gobolka Kharkiv ayaa ka hadlay duqeymaha uu Ruushku ka gaystay labo goobood oo katirsan gobolkaas, wuxuuna uga digay Ruushka cawaaqib xumada ka dhalan doonta weerarada laayaanka ah ee uu ka gaysanayo gudaha dalkaas.
Maamulka militariga maxalliga ah ee gobolka Poltava ayaa sheegay, in weerar xooggan oo aan horay looga bixin wax digniin ah uu burburiyay kaabeyaashii tamarta, taas oo keentay in 164 guri ay koronto la’aan noqdaan, inkastoo aan lasoo sheegin wax khasaare nafeed ah.
Ciidamada Cirka ee Ukraine ayaa ka digay hanjabaaddaha ku saabsan duqeymaha xagga cirka ah ee lagu beegsanayo dhammaan goobaha digniinta laga soo saaro, gaar ahaan magaalooyinka Mykolaiv iyo Kherson, waxayna ka digeen diyaaradaha aan duuliyaha lahayn ee dul heehaabaya meelo badan oo ku kamida waqooyi bari dalkaas, in ay dhici karaan weeraro loo adeegsado gantalada ballistic-ga ah ee uu Ruushku farsameeyo.
