Hal qof ayaa ku dhintay weerar ay diyaarad aan duuliyaha lahayn oo ay Yahuuddu leedahay la beegsatay baabuur marayey magaalada Qaqa’iyat al-Jisr ee koonfurta Lubnaan, sida ay sheegtay wasaaradda caafimaadka ee dalkaas.
Ilo dhanka amaanka ah oo u dhashay dalka Lubnaan ayaa u sheegay warbaahinta, in diyaarada aan duuliyaha laheyn ee Yahuudda ay gaarigaasi la beegsatay laba gantaal, kadibna uu gabi ahaanba gaarigu basbeelay.
Sabtidii lasoo dhaafay, Yahuudda ayaa kordhisay weerarada ay ku qaadayso Lubnaan kadib markii ay sheegtay, in mid kamid ah deegaanada ay ku sugan tahay ee dhanka Waqooyi lagu weeraray gantaalo kaga imaanayay dhanka Lubnaan, halka ururka Shiiciga ah ee Xisbullaah uu dhinaciisa beenisay inuu wax lug ah ku leeyahay weerarkaas.
Duqeymo ay Yahuudda ka geysatay Lubnaan Sabtidii lasoo dhaafay ayaa waxaa ku dhintay 8 qof, halka 31 kalena ay ku dhaawacmeen, sida laga soo xigtay ilo rasmi ah oo Lubnaaniyiin ah.
Taasina waa xadgudubyadii ugu xumaa tan iyo markii xabad joojinta ay dhaqan gashay 27-kii Nofembar ee sanadkii hore.
