Wasaaradda Difaaca ee Ruushka ayaa ku dhawaaqday galabnimadii shalay oo Jimca ahayd, in illaa 85 askari iyo saraakiil ajaaniib ah lagu dilay weerar gantaal oo ciidamadoodu la beegsadeen shir ay lahaayeen hogaamiyayaasha Ukraine iyo tababarayaal ajaaniib ah, kaas oo ka dhacayay maqaayad ku taalla magaalada Kirifii-Ri ee Koonfur-Bari ee Ukraine.
Wasaaraddu waxay ku sheegtay barta Telegram-ka, in illaa 20 baabuur oo kuwa dagaalka ah ay sidoo kale ku burburiyeen, kuwaas oo yaallay goobta ay shirka ku lahaayeen taliyeyaasha cutubyada milatariga ee Ukraine iyo tababarayaasha reer galbeedka ee magaalada Kirifii-Ri, kadib markii ay la beegsadeen gantaal aad u sarreeya oo uu ku rakiban yahay madax dagaal oo aad u qarxaya.
Taas badalkeeda, saraakiisha Ukraine ayaa sheegay, in gantaal lagu weeraray xaafad la deggan yahay oo ku taalla magaalada Kirifii-Ri ay ku dhinteen ugu yaraan 16 qof oo ay ku jiraan 6 carruur ah.
Dhankiisa, madaxweynaha Ukraine Volodymyr Zelensky ayaa sheegay, in gantaalka Ruushka uu Jimcihii la beegsaday xaafad ku taalla magaalada Kirifii-Ri ee koonfur bari ee dalkaasi, taasna ay cadaynaysa inuusan Ruushka rabin waxaan ka ahayn dagaal.
Magaalada Kirifii-Ri oo ah halka uu ku dhashay madaxweynaha Ukraine ee Volodymyr Zelensky ayaa marar badan la kulantay weerarrada Ruushka, Arbacadii ina dhaaftay ayay ahayd markii duqeymo uu Ruushku ku garaacay magaaladaasi, ay ku dhinteen ugu yaraan 4 qof, halka in ka badan 10 kalena ay ku dhaawacmeen.
