Waddan Rwanda ee dhaca qaaradda Afrika ayaa Isniintii ku dhawaaqay, inuu jaray xiriirkii diblomaasiyadeed ee uu la lahaa Belgium-ka oo ah dal ku yaalla qaaradda Yurub, isla markaana uu dalkiisa ka cayriyay dhammaan dublamaasiyiinta dalkaas, iyadoo uu xumaaday xiriirka labada dal colaadda ka taagan Jamhuuriyadda Dimuqraadiga ah ee Kongo awgeed.
Wakaaladda wararka ee Reuters ayaa ka soo xigatay wasaaradda arrimaha dibadda ee Rwanda, inay ku amartay dhammaan dublamaasiyiinta Belgium-ka inay dalka kaga baxaan 48 saacadood gudahood.
Madaxwaynaha Rwanda ayaa mar uu ka hadlayay isu soo bax ka dhacay caasimadda dalkaas waxa uu yiri “Belgium-ka oo ah Gumeysigii hore ee Ruwaanda, waxa uu taariikh u leeyahay in uu burburiyo dalka Rwanda, waxa uu qabsaday qeyb weyn oo ka mid ah dhulka Rwanda oo uu siiyay Kongo xilligii gumeysiga, taas oo Rwanda ka dhigaysa mid ka yar Belgium-ka”. Waa sida uu hadalaka u dhigaye.
Geesta kale, Wasiirka Arrimaha Dibadda ee Belgium-ka ayaa bartiisa “X”, kusoo qoray, inay aad uga xun yihiin go’aanka Rwanda ee ah in ay xiriirka diblomaasiyadeed u jarto dalkiisa.
Si kastaba ha ahatee, kilaafka labada dal ayaa salka ku haayo colaadda ka taagan Bariga Kongo, Horaantii shalay ayay ahayd, markii madaxweynaha Rwanda Paul Kagame uu ku eedeeyay Belgium-ka inuu kor u qaadayo cunaqabateynta caalamiga ah ee ka dhanka ah dalkiisa, iyadoo lagu eedaynayo Rwanda, inay taageero malatari siiso xooggaga M-23 ee mucaardka ku ah dawladda Conga, kuwaas dhawaanahan la wareegay dhul baaxad leh oo ka tirsan Bariga Jamhuuriyadda Dimuqraadiga ah ee Kongo.
