Iyadoo ay sii kordheyso xiisadaha siyaasadeed iyo kuwa milateri ee ka taagan Koonfurta Suudaan, ayay dowladda Uganda ku dhawaaqday, inay ciidamo gaar ah u dirayso caasimadda Juba, si ay u xoojiyaan ammaanka iyo xasilloonida, iyadoo ay sii kordhayso cabsida laga qabo dagaal sokeeye oo cusub oo u dhexeeya madaxweynaha Koonfurta Suudaan Salva Kiir Mayardit iyo ku-xigeenkiisa koowaad, Riek Machar.
Faragelinta milateri ee Uganda ayaa ka tarjumaysa walaaca Kampala ee ku aaddan saamaynta ka dhalan karta dhibaatada ka sii daraysa ee Koonfurta Suudaan, gaar ahaan haddii xaaladda kasii daraysa ay horseedi karto, in tiro badan oo qaxooti ah ay u barakacaan Uganda, taas oo cadaadis ku noqonaysa ilaha dhaqaalaha ee dalkaas, iyadoo dhanka kale khatar ku ah xasilloonida gudaha.
Wiilka Madaxweyne Museveni ahna Taliyaha Ciidanka Uganda, ayaa ku nuuxnuuxsaday, in waddankooda uusan u dulqaadan doonin isku day kasta oo lagu wiiqayo awoodda Madaxweyne Salva Kiir.
Wiilka Museveni ayaa yiri, “Annaga haddaan nahay ciidamada Uganda waxaan aqoonsannahay hal madaxweyne oo keliya oo ka jira Koonfurta Suudaan, waana Madaxweyne Salva Kiir.
Hadalkan xooggan ayaa ka tarjumaya sida Uganda ay uga go’an tahay, inay taageerto dowladda Salva Kiir, gaar ahaan marka la eego xiriirka dhow ee uu la leeyahay madaxweynaha Uganda Yoweri Museveni oo ka mid ah taageerayaashiisa ugu caansan ee gobolka.
Tallaabadan ayaa kusoo beegmaysa xilli xasaasi ah, iyadoo dalka Koonfurta Suudaan uu wajahayo dagaallo ay dad badan ku dhinteen iyo xarig ka dhan ah siyaasiyiinta daacadda u ah madaxwayne ku xigeenka dalkaas, taas oo khatar ku ah heshiiskii nabadeed ee la saxiixay sannadkii 2018-kii.
