Weerar duqayn ah ayay diyaarado aan duuliyaha lahayn la beegsadeen gobalka Canfarta ee dalka Itoobiyo, kaas oo gaystay khasaere dhimasho iyo mid dhaawac intaba.
In ka badan siddeed qof ayaa ku dhintay tiro kalena way ku dhaawacmeen weerar dhinaca cirka ah oo ay fuliyeen diyaaradaha aan duuliyaha lahayn ee Drones 30-kii bishan January 2025-ka, kaas oo ka dhacay gobolka Canfarta ee dalka Itoobiya, gaar ahaan meel ku dhow xuduudka uu dalkaasi la wadaago Jabuuti.
Weerarkan ayaa si gaar ah waxa uu uga dhacay deegaanka Siyaru Kebele oo hoostaga degmada Ceel-Daar oo dhaca xadka labada dal. Mid ka mid ah dadka deegaanka, oo codsaday in aan magaciisa la shaacin ayaa sheegay, in weerarku uu dhacay dhowr jeer, kaas oo sababay dhimashada in ka badan siddeed qof, ayadoon ilaayo hadda si rasmi ah loo xaqiijin karin tirada guud ee dhimashada.
Dadka dhintay ayaa isugu jira haweeney uur leh iyo labo wiil oo walaalo ah, halka ugu yaraan 4 kale ay soo gaareen dhaawacyo halis ah, kuwaasoo labo ka mid ah hadda lagu daweynayo isbitaalka guud ee Dubti oo ku yaalla magaalada Dubti ee gobolka Canfarta.
Sida uu sheegay goobjooge ku sugan deegaankaasi, dadka dhintay waxaa ka mid ah Maxamed Caydahis, Gacma Cali Orbis, Kaako Cali Orbis, Cali Maxamed Kako, iyo Aysha Baddul Cali.
Dadka dhaawacmay waxaa ku jira Mayram Mohamed Abdalla, Fatuma Ali Hammed, iyo Ali Mohamed Ali. Si kastaba ha ahaatee, waxa uu xusay in aan wali la heyn tirada rasmiga ah ee khasaaraha.
Bishii Oktoobar 2022, Wasaaradda Difaaca Jabuuti ayaa sheegtay, in toddobo askari lagu dilay weerar lagu qaaday Guutada Tadjourah. Wasaaraddu waxay intaas kaddib sheegtay in dagaalyahannada FRUD ay “argagixiyeen oo dhac u geysteen dadka ku nool deegaannada fog fog”.
