Ciidamada Yahuudda ayaa gudaha u galay waaberigii maanta oo Jimca ah, magaalooyinka Tubas iyo Qalqilya oo ka tirsan Daanta Galbeed ee la haysto, waxayna xireen ugu yaraan Labo ruux oo falastiiniyiin ah, iyagoo lakulmay dagaal xooggan oo kaga yimid dhanka dagaalyahannada iska caabinta falastiiniyiinta oo ka hortagayay duullaankooda gartarrada ah.
Ilo wareedyo ayaa sheegaya, in iska horimaad hubeysan uu dhexmaray dagaalyahanada wax iska caabinta falastiiniyiinta iyo ciidamada gumaystaha Yahuudda ee gudaha u galay magaalada Tubas ee dhacda waqooyiga daanta galbeed.
Guutada Al-Qudus ayaa sheegtay, in ciidamadooda ay dagaal culus la galeen ciidamada gumaystaha ee ku soo duulay magaalada Tubas, iyagoona walxaha qarxa la beegsaday gaadiidkii uu cadawgu watay, halkaas gumaystaha waxaa kasoo gaaray khasaaro ballaaran.
Xarunta warfaafinta falastiiniyiinta ayaa sheegtay in ciidamada gumaystaha ay xireen ruux Falastiini ah oo lagu magacaabo Salah Mustafa Abu Mutawac, kadib markii ay xoog ku galeen gurigiisa oo ku yaallay magaalada Tubas.
Dhanka kale: ilo wareedyo ayaa sheegaya in ciidamada guumaystaha Yahuudda ay xoog ku galeen magaalada Qalqiliya ee dhacda waqooyiga daanta galbeed, Warbaahinta falastiiniyiinta ayaa sheegtay in ciidamada gumaystaha ay qabteen wiil dhalinyaro ah oo lagu magacaabo Sajid Jibriil, kadib markii ay weerareen isaga oo ku sugan magaalada Qalqiliya.
Tuulada Beit Furik ee dhacda bariga magaalada Nablus, 5 qof oo falastiiniyiin ah ayaa ku dhaawacmay rasaas ay ciidamada Yahuudda ku fureen iska hor’imaadyo ay la galeen shacabka Falastiiniyiinta, kadib markii ay xoog ku galeen tuulada.
Hay’adda Bisha Cas ee Falastiin ayaa bayaan ay soo saartay ku sheegtay, in shaqaalaheeda ku sugan Nablus ay la tacaaleen 5 ruux oo ku dhaawacmay rasaasta ay ciidamada Yahuudda ku fureen, kadib markii ay weerareen tuulada Beit Furik ee bariga magaalada Nablus, waxaana loo gudbiyay isbitaalka Hay’adda.
