Wararka ka imaanaya dhanka Qaza ayaa ku waramaya in 13 Falastiiniyiin ah lagu dilay aroornimadii hore ee saaka weerar ay Yahuuddu ku qaaday guri iyo teendho ay ku noolaayeen dad barakacayaal ah oo ku yaalla Khan Yuunis ee koonfurta marinka Qaza.
Ilo goob-joogayaal ah ayaa sheegay, in 10 Falastiiniyiin ah la dilay kaddib markii la beegsaday guri ay kaga sugnaayeen xaafada Al-Manara ee koonfur bari kaga beegan Khan Yuunis.
Sidoo kale dadkan goob-jooga ahaa ayaa sheegay, in saddex Falastiiniyiin ah lagu dilay kuwa kalana lagu dhaawacay weerar lagu qaaday teendho ay ku noolaayeen dad barakacayaal ah oo ku taallay galbeedka Khan Yuunis, dadka dhaawaca ah ayaa loo gudbiyay Isbitaalka Shuhadada Al-Aqsa ee ku yaalla Deyrul-Balah.
Diyaaradaha Yahuudda ayaa sidoo kale duqeymo culus ku burburiyay warshad nadiifisa biyaha oo ku taalla xaafada Al-Tuffah ee bariga magaalada Qaza. Xafiiska warbaahinta dowladda ee Qaza ayaa sheegay, in inka badan 90% dadka deggan Marinka ay hadda la’yihiin ilo ay ka helaan biyo nadiif ah, kaddib markii ay Yahuuddu burburisay in ka badan 700 oo ceel.
Tan iyo markii uu dib u bilaabay xasuuqa ay Yahuuddu ka gaysanayso marinka Qaza 18-kii Maarso, waxaa la diwaan galiyay istishhaadka ku dhawaad 1,300 oo Falastiiniyiin ah, iyadoo ay ku dhaawacmeen ku dhawaad 3 kun oo kale oo u badan caruur iyo haween.
