Ismail Barhoum wuxuu ahaa shaqsi caan ka dhex ahaa dhaqdhaqaaqa iska caabinta Xamas, Waxaa loo doortay xafiiska siyaasadeed sanadkii 2021-kii. Waxa uu sidoo kale soo noqday madaxa waaxda maaliyadda ee gobolka, ninkan ayaa door muhiim ah ka qaatay maareynta dhowr urur oo samafal ah iyo hay’ado kale.
Xamaas ayaa ku dhawaaqday dilka Ismail Barhoum 23-ka bishan, kaddib duqeyn ay Yahuuddu la beegsatay qayb ka mid ah cisbitaalka Naasir ee ku yaalla Khan Yunis, ee koonfurta marinka Gaza. Xamaas ayaa bayaan ay soo saartay ku sheegtay in Barhoum uu ku shahiiday weerar fulaynimo ah oo ay fuliyeen ciidamada Yahuudda.
Maraykanka iyo Ingiriiska ayaa cunaqabatayn ku soo rogay dhowr hoggaamiye oo Xamaas ah oo uu ku jiro Ismaaciil Barhoum, iyagoo xayiray hantidiisa, isla markaana mamnuucay dhaq-dhaqaaqyadiisa maaliyadeed, maadaama uu ahaa shakhsi boos wayn ugu fadhiya hawlaha muqawamada.
