Maamulka Yahuudda ayaa xiray nin cusub oo Yahuudi ah, kaas oo lagu eedeeyay inuu basaas u ahaa dowladda Shiicada Iran, taas oo tirada dadka loo soo xiray kiiskan ka dhigaysa 50 qof muddooyinkan dambe.
Ninkan oo lagu magacaabo Eduard Yosefov, ahna 65 jir, ayaa waxaa laga shaqaalaysiiyay magaalada Dubai ee caasimadda Imaaraatka Carabta, waxaana shaqaalaysiiyay qof sheeganayay inuu ka soo jeedo dalka Azerbaijan.
Intaasi kadibn waxa uu ogolaaday inuu fuliyo hawlgallo basaasnimo oo ay ku jiraan la socodka iyo sawirista mishiinka Nukliyeerka ee Yahuudda, dekedda Haifa iyo saldhigyada ciidamada Sahaayinada Yahuudda. Si uu u fuliyo hawlahan, Yusufov wuxuu kiraystay guri dabaq ah oo ku yaalla Haifa.
Geesta kale, wargeyska Cibraaniga ah ee Maariv ayaa shaaca ka qaaday, welwelka sii kordhaya ee Yahuudda ee ku aaddan basaasiinta joogtada ah ee Iran iyo isku daygeeda aan kala joogsiga lahayn.
Wargeysku wuxuu xusay, in waaxda sirdoonka ee Yahuudda ay daaha ka qaaday dhowr kiis oo basaasnimo ah oo ay ku lug lahaayeen Israa’iiliyiin u shaqeynayay Iran sannadkii hore, taas oo ah mid aan horay loo arkin oo walaaceeda wadato.
