Ilo-wareedyo Syrian ah ayaa u sheegay warbaahinta, in Madaxweynaha Syria Axmed Al-Sharaa uu booqan doono Sacuudiga maanta oo Axad ah, taas oo qaadan doonta labo maalmood.
Booqashadan ayaa ah mid muhiimad gaar ah leh maadaama ay tahay booqashadii ugu horeysay ee Madaxweynaha Suuriya uu ku tago dalka dibaddiisa. Inta uu socdo kulankaaas ayaa waxaa looga hadli doonaa arrimo quseeya xiriirka labada dal.
Arbacadii lasoo dhaafay maamulka cusub ee Suuriya wuxuu ku dhawaaqay, in Al-Sharaa loo magacaabay madaxweynaha dalka inta lagu guda jiro marxaladan ku meel gaar ah, iyadoo ay sii dheer tahay go’aanno kale oo ay ka mid yihiin in la kala diro kooxaha hubeysan iyo hay’ado amni oo soo jiray xiligii dawladdii hore.
Khamiistii lasoo dhaafay Boqorka Sacuudiga, Salmaan Bin C/casiis iyo Dhaxal-sugaha Boqortooyada Maxamed Bin Salmaan ayaa ugu hanbalyeey Axmed Al-Sharaa munaasadda calayma saarkiisa, iyagoo u rajeeyay guul, sida ay sheegtay Wakaaladda wararka Sacuudiga ee SPA.
Bilowgii bishan wasiirka arimaha dibadda ee Suuriya Asaad Al-Sheibaani ayaa booqasha ku tagay magaalada Riyaad ee caasimadda Sacuudiga, waxa ay ahayd booqashadii ugu horreysay ee uu dalka dibadiisa ku tago wasiirka arrimaha dibadda ee Suuriya.
Jimcihii la soo dhaafay, Wasiirka Arrimaha Dibadda Sacuudiga, Faysal Bin Farxaan, ayaa u xaqiijiyay Dimishiq in dalkiisu uu garab taagan yahay maamulka cusub ee Suuriya, isla markaana ay ka taageerayaan arrinta ku saabsan qaadista cunaqabateynta ee ay kusoo rogeen reer galbeedka, taas oo kamid ah hababka ay ree Galbeedku u gumaystaan dalalka fikir ahaan kasoo horjeeda.
